補充對內銀的一些看法

尋晚與一眾朋友傾開，有朋友認為中國債務個泡沫會爆。我不否認未來總有一天這觀點會對，因為這等如中國經濟總有一天會下滑/衰退，總有一天一定中，但可能係五年後/十年後，Now, who TMD cares，最少我認為中國經濟未來兩年都唔會因為債務問題令到經濟向下滑。

下圖係中國銀行體系NPL(non performing loan)結構圖(Sources: GS)，即係還唔到錢既人係屬於咩行業。 70%來自製造業(鋼、鋁等前幾年產能超級過剩的行業)，及採礦業(煤)。前幾年這些行業處於水深火熱之間，現金流負數，還錢就無可能，命就有一條，所以內銀的潛在壞帳遠比report出尼既高。

然而2017年供給側改革開始針對一些在產產能而不是前幾年的帳面上的產能(Paper Capacity)，這些水深火熱的行業亦都開始賺錢同還到錢。當NPL主要既人都還到錢，銀行資產質素自然大大改善，這亦是今年以來內銀跑嬴主要原因，而這重估浪完未? 我相信未。

供給側改革在未來幾年都會持續並嚴格實行((這或反映了政府對經濟增長的信心)，多個行業新增產能基本上無望，只有置換產能。若資源價格維持目前位置，銀行質素將持續改善((銀行倒閉風險大降)，咁既情況債務會爆，可能性遠低於前幾年? 除非樓價大跌，但從中國政府政策來看，短期未有爆煲風險。

題外話: 近幾年對香港樓市的判斷基本上係中國經濟唔爆，香港樓價唔會跌，美國加息等影響都不及這因素。按照目前情況，中國經濟未來一至兩年應該唔會差，當然GDP增速會減慢((不講求粗放式增長，講求增長的質素)，實際上企業盈利會更加Solid，這對經濟絕對係好事。結論係，有意置業既繼續努力儲首期啦，唔好望短期會大跌。